怎樣才可以做個悠閒的 IT人？

相信唔使我講，你地都知道我真係好得閒。成日有sell屎上來探我就問我係咪成日要返大陸。我一定話係，其實我一個月先去一兩日，仲要睇心情和生理狀況，例如腰骨會唔會很累。

回想頭一個月來這間上市山寨廠做，得自己走前一丁，個屎統又千瘡百孔，真係晚晚通宵都唔店。當時返了幾日，政府那邊又有offer，已經想走頭。但係食過兩年皇家飯(當年還是英女皇做事頭婆)，已經覺得自己行屍走肉，遲早廢武功，所以寧願賺少些也返翻出來商界。

正如謙記話齋，你鍾意的永遠得唔到，你唔鍾意的永遠跟住你。在這間上市山寨廠一做就十年(還差45日)。山寨生意番了一番，但人口番了七倍。雖然搵個金毛獅王來做CFO，但管理依然山寨式，開會冇schedule，冇agenda，開完冇minute + action plan。十年來未見過一份business plan，只有老細在年報裡吹水唔抹咀的業務回顧，十年都一樣。請過Group HR Manager返來，冇位坐，再打入冷宮，佢建議的所有野，全部turn down。永遠冇培訓，冇績效評估，最慘十年來連畫個organization chart都冇法子畫得出。

男人有幾多個十年？睇見D同事個個雞飛狗走，唯獨PK衰人獨憔悴，唔通真係坐係度等 layoff？但又走得去邊？份人工已經係行內極限，而且對方若非又是爛攤子，佢地個IT又怎會走人。

點解IT人工永遠低過廢難數？好簡單，廢難數識得講美麗而合法的謊言，IT永遠硬居居 program個電腦講真話。老細話點解今年賺少左，佢係去搵廢難數唔係搵IT，佢地自然會做好靚的 window dressing。IT佬永遠只識在電腦印份report，永遠嚇親老細。That's why 我地問親廢難數個屎統有冇改善空間，佢地永遠都話冇。不過，如果佢地計唔店，自然會話電腦錯。

有一年公報業績之後，老細先至叫幫我地核數那間地雷核數師上來開會，話今年[可能]under/over state D profit喎。班核數師當堂嚇到面青。但係老細話，我地知道我地個系統有問題，所以叫你地來幫我地check 下。呢個 project 當然唔會係幾萬銀貨仔啦。於是大鑼大鼓咁研究有乜問題。到處訪問，搞左幾個月，地雷循例出份 draft proposal。最過癮係個屎統冇野要改。全部係加D乜乜物物的procedure，簽下名之類。然後更過癮係份proposal永遠係 draft，有份copy在我檯面放了幾年，冇人傾過，冇follow up。心水清者都知其實係演戲一場。由第一天開始我就未認真睇過。

所以IT永遠只可以做二奶，即係細契，一定要爆陰毒才可以上位。明乎此，PK已經開始研究人工智能，即係教曉電腦識講大話。想像下，部電腦對住你就講真話，對住出面就講假話，係咪大有市場。絕對係革命性設計。

好似講到呢度都未對題。其實答案已經一早寫在網誌分類上。大家自己參透參透。