五天工作週，發夢冇咁早

聖經對人間之為禍，莫過於將一個星期定為七日，仲要話明六日工作一日休息。上帝既然全能，點解唔用一日創造天地，六日休息？或者造四日休息一日都好丫。偏偏搞個七日出來，又除唔盡三十同365。你話係咪搞野。

我地呢間上市山寨廠一向貫徹聖經之教導，出面行家個個實施左五天工作週九年，佢依然六日。之前經濟唔好，班伙計死死氣係到捱驢仔，個個做到八九點(PK 例外，非常準時。)而家經濟好，班友個個雞飛狗走，換人換到我都冇法子記得同事的名，日日同佢地開email account，開完冇耐又要 delete。孖蠢阿頭已經大叫救命。傳聞佢提出要改制，實行五天工作週，企圖遏止逃亡潮。

傳聞提議已經獲得集團總裁同意，大小公子個個話好。豈料我地個福佳主席死都唔肯。佢話流失率高係你地管理不善，依家D野都話做唔徹，返少半日點做得徹。總裁、集團人力資源經理、孖蠢阿頭、大小公子力陳利害，佢都唔肯。最後佢發爛渣，話要返你地那邊自己返。Report俾佢的全部照舊。

傳聞由七月一號開始，本公司實行一國兩制，所有report 俾行政總裁的，每週工作五天。我地(IT，會計，秘書，人事部) direct report 俾福佳主席的，照舊5.5天。天才老細竟然講出 －－我睇唔到呢班人會走。

點解全部都係傳聞？因為敝上市山寨廠向來有關公司政策，尤其是同福利有關的決定，係唔會同各部門主管商量下，只會三兩個巨頭閂埋門黑箱作業。今次呢單野更加唔會出memo，唔會有正式通知。

我收到風，只有慨嘆，枉佢坐得呢個位，連乜野叫 organizational justice都唔知。呢個世界，不患不足，只患不均。連呢個道理佢都唔識。佢唔知自己正在懲罰做得好的部門(假設 low turnover rate係 good performance)，獎勵做得差的部門。

更蠢的是，全公司百幾人，八成都返五天。此乃佢冇法子改變之事實，因為行政總裁唔聽佢之笛，那一系列的人馬已經因為呢單野劃清界線。佢為啖氣得罪埋自己班馬，連對佢向來唯命是從的廢難數都唔妥佢。

我覺得主席身邊已經冇晒自己友。我遺憾有個咁既老細但自己又走唔甩，只有遷怒聖經同上帝。