忠臣擇主而事，世界仔擇槽而跳

你想做世界仔還是做忠臣？

在這間上市山寨廠就快呆了十年了，人工加過了幾次，目前有珠珠的一半(按傳說中的來計)，但工齡卻是她的八倍。學歷也高她兩倍。按我的加薪幅度，即使每年都加一次人工，都要十幾年後才追到珠珠(份人工)。

人比人比死人，我只係借題發揮。正如網友所言，每人走的路各不相同。毋須同人比。

今時今日，即使減薪三分一，也夠我供樓同養老婆，人工加幾多對我的生活質素根本冇乜影響。問題是工資也代表公司對你的工作的認同。做得好加多些，不好加少些。即使唔加，都可以大家傾下互相間對工作的期望。

十年，沒有一次 performance apprasial。每年不是側側膊唔加，就是求其加小小。加人工最多那次是因為我掟封辭職信入去，條粉腸先肯加番多的。最興一次是走入來講句，舊年你 nothing better nothing worse，放低張支票走人。又有一年，突然入來同我講，今年只可以給你咁多，因為問過其他部門關於電腦部的評語。我想燒佢令壽堂，點解佢唔問返我對其他部門的評語？還有佢用什麼方法問？評估標準係乜？點解我從來唔知有此標準？

點解佢唔問下舊年我地 system的 total down time係幾多？我地 complete了幾多個tasks。我部門的turn over rate係幾多？前年公司的communication cost 係幾多，今年又少左幾多？點解公司業績增加一倍，個個部門人手就加十倍，我個部門反而可以減人，到底那個部門更加 effective？
佢唔加人工我只會話佢孤寒，但係用這些藉口，係咁倚加的多，是在侮辱我的尊嚴和我的智慧。

想做忠臣，先要識得搵老細。這個老細不但要賞識你的才幹，自己也要有領導才能，賞罰分明。可惜，在香港暴發戶就多得很，企業家則少得可憐。有空時就去打哥芙，肯去進修學習怎樣治理自己間公司的少之又少。肯同下屬傾下管理概念的，我仲未見過。我見過的是只會在開會時指指點點的廢柴。

你一定要識得分別器重你和識得駛你的分別。器重你的會俾決定權你，駛你的會叫你做乜做物，但係乜輪都係佢話事，做每個決定都要請示佢。

如果冇伯樂，只有做世界仔，邊到富貴就跳去邊到，最緊要係識走位。

願上帝保祐我老細。希望佢及早覺悟，趁早請我食肥雞餐。